मराठी संगीतविश्वात गेल्या काही वर्षांत रॅप आणि हिप-हॉपचा प्रभाव झपाट्याने वाढताना दिसतो आहे. पारंपरिक संगीतासोबतच तरुणाईच्या भावना व्यक्त करणाऱ्या नव्या शैलींनाही मोठा प्रतिसाद मिळत आहे. या बदलत्या प्रवाहात कोल्हापूर जिल्ह्यातील तरुण रॅपर ए किंग ( Rapper A King) याने आपल्या नव्या रॅप सिंगल “वाघ आला”द्वारे दमदार एंट्री केली आहे. ग्रामीण पार्श्वभूमी, स्थानिक कलाकारांचा सहभाग आणि ऊर्जादायी सादरीकरणामुळे हे गाणे विशेष ठरत आहे. “वाघ आला” या गाण्याचे संपूर्ण चित्रीकरण कोल्हापुरातील ग्रामीण भागात करण्यात आले आहे. (Wagh Aala Marathi Rap)
शिरोली एमआयडीसी येथील इंदिरानगर परिसरात पार पडलेल्या शूटमध्ये गावाकडची माती, रस्ते आणि नैसर्गिक वातावरण प्रभावीपणे टिपण्यात आले आहे. या गाण्याचे दिग्दर्शन ए किंग आणि विकास पवार यांनी केले असून, गीतलेखन स्वतः ए किंगने केले आहे. संगीत संयोजनाची जबाबदारी प्रवीण एवाळे यांनी सांभाळली आहे.
ए किंग सांगतो की, लहानपणापासून संगीताची आवड असल्याने त्याने या क्षेत्रात पाऊल टाकले. त्याच्या मते रॅप आणि हिप-हॉप हे केवळ मनोरंजनाचे साधन नसून ते सामाजिक संदेश देण्याचे प्रभावी माध्यम आहे. “वाघ आला” हे गाणे तयार करताना त्याला उर्जादायी आणि प्रेरणादायी आशय मांडायचा होता. उच्च पट्टीतील या गाण्याच्या रेकॉर्डिंगदरम्यान त्याला अनेक वेळा रिटेक घ्यावे लागले, पण अंतिम परिणामाबद्दल तो समाधानी आहे. शूटिंगदरम्यान घडलेली एक खास घटना म्हणजे गावातील एका आजोबांनी अचानक सेटवर येऊन गाण्यात सहभागी होण्याची इच्छा व्यक्त केली; त्यांच्या सहभागामुळे चित्रीकरणाला वेगळीच रंगत आली. (Wagh Aala Marathi Rap)
===============================
===============================
सध्या “वाघ आला” हे गाणे आणि त्याचा व्हिडिओ सोशल मीडियावर वेगाने व्हायरल होत असून, मराठी रॅपच्या नव्या लाटेला आणखी बळ देत आहे. स्थानिकतेचा अभिमान, दमदार शब्दरचना आणि जोशपूर्ण सादरीकरण यामुळे ए किंगचे हे गाणे मराठी हिप-हॉपमध्ये वेगळी ओळख निर्माण करत आहे.
