Bigg Boss Marathi 6 या बहुचर्चित रिअॅलिटी शोच्या नव्या सीझनला सुरुवात होताच घरात वाद, तणाव आणि भावनिक क्षणांचा भडिमार सुरू झाला आहे. अवघ्या काही दिवसांतच घरातील वातावरण तापल्याचे पाहायला मिळत असून, नॉमिनेशन टास्कदरम्यान घडलेल्या एका घटनेने प्रेक्षकांचे लक्ष वेधून घेतले आहे. नॉमिनेशन प्रक्रियेदरम्यान तन्वी कोलते (Tanvi Kolte) आणि सागर कारंडे (Sagar Karande) यांच्यात जोरदार शाब्दिक चकमक झाली. या वादाने इतका टोकाचा आकार घेतला की, तन्वी भावनांच्या भरात पूर्णपणे कोलमडल्याचे दिसून आले. प्रोमोमध्ये तन्वीच्या डोळ्यांतून अश्रू वाहताना दिसत असून, तिला स्वतःला सावरणेही कठीण झाले होते. मागील काही भागांपासून दोघांमध्ये काही कारणांवरून खटके उडत असल्याचे दिसत होते, मात्र या वेळी हा वाद अधिकच भावनिक वळणावर पोहोचला.(Bigg Boss Marathi 6)
तन्वीला अशा अवस्थेत पाहून घरातील इतर सदस्यांनी आपापले मतभेद बाजूला ठेवत तिला धीर देण्यासाठी धाव घेतली. सगळे सदस्य तिला शांत करण्याचा आणि सांत्वन देण्याचा प्रयत्न करताना दिसतात. याच दरम्यान राकेश बापट ( Rakesh Bapat) तन्वीला समजावण्याचा प्रयत्न करत म्हणतो, “आज रडायचं नाही, आज चांगला दिवस आहे.” तो तिला पाणी आणून देण्यासही सांगतो, ज्यामुळे घरात एक भावनिक पण सकारात्मक क्षण पाहायला मिळतो. दुसरीकडे, सागर कारंडे घराबाहेर बसलेला असताना तोही आपली भावना व्यक्त करताना दिसतो. “बिचारी… मला तिचं खरंच वाईट वाटतं आहे. ती जर एकदा माझ्याशी येऊन बोलली असती, तर मी तिला पूर्ण हलकं केलं असतं,” असे शब्द तो वापरताना दिसतो. या वक्तव्यामुळे या वादामागील गैरसमज आणि भावनिक गुंतागुंत अधिक स्पष्ट होते.
दरम्यान, नॉमिनेशन प्रक्रियेत घरातील तब्बल ९ सदस्यांवर इविक्शनची टांगती तलवार लटकत आहे. या प्रक्रियेदरम्यान स्पर्धकांनी एकमेकांवर गंभीर आरोप करत परस्परांना नॉमिनेट केले, ज्यामुळे घरातील तणाव आणखी वाढला आहे. आता यामधून कोण सुरक्षित राहणार आणि कोणाचा प्रवास थांबणार, याकडे प्रेक्षकांचे लक्ष लागले आहे.याशिवाय, पहिल्या आठवड्यातील कॅप्टन्सीसाठी ‘बीबी फार्म’ हा महत्त्वाचा टास्क पार पडणार आहे. या टास्कसाठी स्पर्धकांची दोन गटांत विभागणी करण्यात आली असून, शेतातील कापूस आणि इतर मालमत्ता जमा करण्याच्या या खेळात स्पर्धकांनी सर्व मर्यादा ओलांडल्याचे दिसते. टास्कदरम्यान जोरदार धक्काबुक्की, आक्रमकता आणि वाद पाहायला मिळाले. (Bigg Boss Marathi 6)
=============================
हे देखील वाचा: Sairat सिनेमातील परशा उतरणार राजकारणाच्या मैदानात? वायरल फोटोंमुळे चर्चांना उधाण
==============================
प्रोमोमध्ये विशाल आणि ओमकार यांच्यात शारीरिक झटापट झाल्याचे स्पष्टपणे दिसते, तर रोशन रागाच्या भरात आक्रमक पवित्रा घेतल्याने इतर सदस्यांना मध्यस्थी करावी लागते. या सगळ्या घटनांमुळे घरातील वातावरण अधिकच तापले असून, यंदाचा सीझन प्रेक्षकांसाठी भरपूर ड्रामा, भावना आणि संघर्ष घेऊन येणार असल्याचे स्पष्ट झाले आहे.एकूणच, सुरुवातीच्या आठवड्यातच ‘बिग बॉस मराठी ६’ ने वाद, अश्रू आणि थरार यांचा जोरदार डोस दिला आहे. पुढील दिवसांत हे समीकरण कसे बदलणार आणि कोण बाजी मारणार, हे पाहणे नक्कीच उत्सुकतेचे ठरणार आहे.
