मराठी मनोरंजन विश्वात गेल्या काही महिन्यांत अनेक सेलिब्रिटींच्या लग्नाच्या आणि साखरपुड्याच्या बातम्या चर्चेत राहिल्या आहेत. ‘बिग बॉस मराठी 3’ फेम जय दुधाणे आणि सोशल मीडिया इन्फ्लुएन्सर हर्षला पाटील यांचे लग्न, तसेच ‘लग्नानंतर होईलच प्रेम’ फेम ज्ञानदा रामतीर्थकरचे साखरपुडा, यामुळे चाहत्यांमध्ये लग्नाच्या चर्चेला जोर मिळाला. आता या यादीमध्ये आणखी एक नाव जोडले जात आहे ते आहे अभिनेत्री गायत्री दातार (Gayatri Datar).
गायत्री दातार, जिने ‘तुला पाहते रे’ (Tula Pahate Re) मालिकेतून प्रेक्षकांच्या मनात विशेष स्थान मिळवलं आहे, नेहमीच तिच्या अभिनयामुळे चर्चेत राहते. मात्र, सध्या ती अभिनयापुरती मर्यादित नाही, तर तिच्या वैयक्तिक आयुष्यातील रोमँटिक गोड बातमीनेही प्रेक्षक आणि चाहत्यांना उत्सुक केले आहे.२५ डिसेंबरच्या दिवशी गायत्रीने सोशल मीडियावर एक रोमँटिक व्हिडिओ शेअर केला. या व्हिडिओमध्ये ती समुद्रकिनारी एका तरुणासोबत आनंदाचे क्षण साजरे करताना दिसते. व्हिडिओसोबत तिने लिहिलंय,”भेटा अशा व्यक्तीला, जो आयुष्यभरासाठी माझा ‘सांता’ असणार आहे!”यासोबतच तिने #engaged आणि #love हॅशटॅग्सही वापरून चाहत्यांमध्ये उत्सुकता वाढवली आहे.
गायत्रीच्या होणाऱ्या नवऱ्याचं नाव श्रीकांत चावरे (Shrikant Chavare) आहे. आणि मिळालेल्या माहितीनुसार, श्रीकांत IIT मुंबईचा पदवीधर असून, तांत्रिक शिक्षण घेतल्यानंतरही त्याला कलेची प्रचंड आवड आहे. तो एक उत्तम फोटोग्राफर आहे आणि खऱ्या अर्थाने अस्सल मुंबईकर आहे. गायत्री आणि श्रीकांत यांची केमिस्ट्री व्हिडिओमध्ये स्पष्ट दिसून येते. गेल्या काही दिवसांपासून गायत्रीच्या प्रेमाच्या चर्चांमुळे चाहत्यांमध्ये उत्सुकता होती, पण जोडीदार कोण आहे, हे अद्याप स्पष्ट नव्हते. आता गायत्रीने रोमँटिक व्हिडिओ शेअर करून पडदा हटवला आहे. यामुळे प्रेक्षकांना आणि चाहत्यांना तिच्या वैयक्तिक आयुष्याबद्दल अधिकृत माहिती मिळाली आहे.
===========================
===========================
गायत्री दातारच्या प्रेमाची ही घोषणा मराठी मनोरंजनविश्वात आनंदाची बातमी ठरली आहे. गेल्या काही महिन्यांतील सेलिब्रिटी विवाह आणि साखरपुड्यांच्या यादीत आता तिचं नावही जोडलं गेलं आहे. चाहत्यांच्या मनात आता उत्सुकता आहे की या जोडीचा पुढचा टप्पा कधी येईल आणि विवाह सोहळा कसा असेल.
