आई म्हणजे निस्वार्थ प्रेम, शांत आधार आणि नकळत मिळणारी ताकद. आई आणि मुलामधील असंच एक हळवं, समजूतदार आणि आजच्या काळाशी जोडलेलं नातं मांडणारा ‘उत्तर’ (Uttar) हा चित्रपट प्रेक्षकांच्या मनाला भिडतो. रेणुका शहाणे ( Renuka Shahane) आणि अभिनय बेर्डे ( Abhinay Berde) यांच्या प्रमुख भूमिकांमुळे ही कथा अधिकच जिवंत होते. चित्रपटगृहात प्रेक्षकांची मनं जिंकून घेतल्यानंतर आता ‘उत्तर’ झी 5 (Zee 5) मराठीवर ओटीटी माध्यमातून पुन्हा एकदा रसिकांच्या भेटीला येत आहे. वेगवान आयुष्याच्या प्रवासात वेळ कधी हातातून निसटतो, हे कळतही नाही. अशा वेळी जीवन आपल्याकडून काही प्रश्नांची उत्तरं मागतं, जी देण्याची तयारी आपण अनेकदा करत नाही. संयम, संवेदनशीलता आणि भावनिक प्रामाणिकपणाच्या आधारावर ‘उत्तर’ची कथा हळूहळू उलगडत जाते आणि प्रेक्षकांना स्वतःच्या नात्यांकडे पाहायला भाग पाडते.(Uttar Movie on Ott)
या चित्रपटात आई आणि मुलामधील नात्याचे सूक्ष्म पदर प्रभावीपणे उलगडले आहेत. उमा ही अशी आई आहे, जिचं मूक प्रेम आणि उबदारपणा कुटुंबाला एकत्र बांधून ठेवतो. तर निनाद हा तरुण, आयुष्याच्या धावपळीत स्वतःला सावरत पुढे जाताना नकळत घरापासून दूर सरकत जातो. परिस्थितीला दोष न देता, स्वतःच्या भावनिक संघर्षाशी झुंज देत तो आईसोबतचं अंतर मिटवण्याचा प्रयत्न करताना दिसतो.
क्षितिज पटवर्धन (Kshij Patwardhan) लिखित-दिग्दर्शित आणि झी स्टुडिओज तसेच जॅकपॉट एंटरटेनमेंट यांच्या निर्मितीत साकारलेला ‘उत्तर’ हा चित्रपट अभिनयाच्या बाबतीतही लक्षवेधी ठरतो. रेणुका शहाणे आणि अभिनय बेर्डे यांच्या भूमिका अत्यंत संयत आणि परिणामकारक आहेत. त्यांच्यासोबत हृता दुर्गुळे आणि निर्मिती सावंत यांच्या अभिनयामुळे कथेला अधिक भावनिक खोली मिळते. बदलती परिस्थिती, गैरसमज आणि मूक भावना यांमधून प्रेम, क्षमा आणि समजूतदारपणाचा प्रवास या चित्रपटात प्रभावीपणे मांडण्यात आला आहे. चित्रपटाविषयी बोलताना रेणुका शहाणे म्हणाल्या की , “उमा ही व्यक्तिरेखा प्रेम, धैर्य आणि सर्व काही योग्य वेळी जुळून येईल या शांत विश्वासातून घडलेली आहे. ही भूमिका साकारणं माझ्यासाठी भावनिकदृष्ट्या खूप जवळचं होतं. तिच्या शांततेतही खूप काही बोलण्याची ताकद होती. ‘उत्तर’ आता अधिक प्रेक्षकांपर्यंत पोहोचणार याचा मला आनंद आहे.”(Uttar Movie on Ott)
===========================
हे देखील वाचा: Bigg Boss Marathi 6 च्या घरातून Omkar Raut बाहेर; आता घरात होणार मोठे बदल
===========================
अभिनय बेर्डे याने आपल्या भूमिकेबद्दल सांगितले, “निनाद हा सतत पुढे धावणाऱ्या पिढीचं प्रतिबिंब आहे. आयुष्यात पुढे जाताना मागे काय राहून जातं, याचा विचार करण्यासाठी अनेकदा वेळच उरत नाही. ही भूमिका साकारताना महत्त्वाकांक्षा, भावनिक दुरावा आणि घराकडे ओढ या सगळ्या भावना व्यक्त करण्याची संधी मिळाली. ‘उत्तर’ ZEE5 वर येत आहे याचा मला खूप आनंद आहे.”
