मराठी मनोरंजन विश्वात सध्या आनंदाची बातमी चर्चेत आहे. लोकप्रिय अभिनेता विशाल निकम (Vishal Nikam) आणि अभिनेत्री अक्षया हिंदळकर (Akshaya Hindalkar) यांनी आयुष्यभराच्या सोबतीचा निर्णय घेत अखेर ते लग्नबंधनात अडकले आहेत. विशेष म्हणजे १० फेब्रुवारी म्हणजेच विशालच्या वाढदिवशी दोघांनी सात फेरे घेत नव्या प्रवासाची सुरुवात केली आहे. सोशल मीडियावर पोस्ट शेअर करत विशालने ही आनंदवार्ता चाहत्यांपर्यंत पोहोचवली होती, आणि त्यानंतर त्यांच्या लग्नाची चर्चा रंगू लागली. महत्वाच म्हणजे मुंबई-पुण्यातील भव्य सोहळ्यांऐवजी या जोडीने उत्तराखंडमधील पवित्र त्रियुगीनारायण मंदिरात (Triyuginarayan Temple) साधेपणाने विवाह करण्याचा निर्णय घेतला.गंगा घाट (Ganga Ghat) परिसरातील हे मंदिर हिंदू परंपरेत अत्यंत पवित्र मानले जाते. पौराणिक कथांनुसार भगवान शिव आणि पार्वती यांचा विवाह याच ठिकाणी झाला होता, अशी श्रद्धा आहे. त्यामुळे अनेक जोडपी आयुष्यभराच्या नात्यासाठी या स्थळाची निवड करतात. विशाल आणि अक्षया यांनीही याच परंपरेचा मान राखत मंदिर परिसरात पारंपरिक विधींनुसार विवाह केला.(Vishal-Akshaya Wedding)
या दोघांचा लग्नसोहळा अतिशय खाजगी ठेवण्यात आला होता. फक्त जवळचे कुटुंबीय आणि काही निवडक नातेवाईक यांच्या उपस्थितीत विधी पार पडले. अक्षयाने केशरी रंगाचा आकर्षक घागरा परिधान केला होता. पारंपरिक दागिन्यांसह तिचा लूक अत्यंत देखणा दिसत होता. तर विशालने हिरव्या रंगाची धोती आणि पांढरे उपरण परिधान करत साधेपणातला रुबाब दाखवला. दोघांचाही पारंपरिक आणि सोज्वळ अंदाज चाहत्यांच्या पसंतीस उतरला आहे. लग्नाचा व्हिडीओ शेअर करत विशालने एक भावुक कॅप्शन लिहिलं. “चंद्रभागेसारखं प्रेम आपलं सखी, मी तुझ्यात सामावून जाईन, रुसली जरी तू रखुमाई सारखी, मी सावळा विठ्ठल होऊन जाईन, कायम तुझा रुसवा काढून, तुला आयुष्यभर मनवत राहीन.” अस म्हणत त्याने अक्षयावरचं प्रेम व्यक्त केलं. या पोस्टनंतर सोशल मीडियावर शुभेच्छांचा वर्षाव झाला. चाहत्यांसोबतच इंडस्ट्रीतील मित्रमंडळींनीही नवदांपत्याला शुभेच्छा दिल्या.
विशाल आणि अक्षया यांनी स्टार प्रवाहवरील ‘साता जन्माच्या गाठी’ या मालिकेत एकत्र काम केलं होतं. त्या काळातच दोघांची मैत्री घट्ट झाली आणि पुढे त्याच मैत्रीचं रूपांतर प्रेमात झाल्याची चर्चा आहे. पडद्यावरची केमिस्ट्री आता खऱ्या आयुष्यातील नात्यात रूपांतरित झाल्याने चाहते त्यांच्या प्रेमकथेची अधिक माहिती जाणून घेण्यासाठी उत्सुक आहेत.(Vishal-Akshaya Wedding)
============================
हे देखील वाचा: Bigg Boss Marathi 6 च्या घरात नवा रणसंग्राम; ‘टरमाळी’ म्हणत रुचिताचा राखीशी पंगा
============================
एकूणच, ग्लॅमर आणि दिखाव्यापेक्षा परंपरा आणि अध्यात्मिकतेला प्राधान्य देत विशाल आणि अक्षया यांनी केलेला हा विवाह सोहळा मराठी इंडस्ट्रीत वेगळेपणाने लक्ष वेधून घेत आहे. त्यांच्या नव्या आयुष्याला चाहत्यांकडून भरभरून शुभेच्छा मिळत आहेत.
