भारतीय चित्रपटसृष्टीत सध्या सर्वाधिक चर्चेत असलेला प्रकल्प म्हणजे ‘रामायण’ (Ramayana Movie 2026) . निर्माता नमित मल्होत्रा आणि दिग्दर्शक नितेश तिवारी यांच्या या महत्त्वाकांक्षी प्रकल्पाकडे प्रेक्षकांचे लक्ष लागले आहे. दोन भागांमध्ये साकारली जाणारी ही भव्य कथा आता आधुनिक तंत्रज्ञानासह नव्या पिढीसमोर येणार आहे. नुकताच रणबीर कपूरचा भगवान रामाच्या रूपातील पहिला लूक समोर आला असून, त्याने सोशल मीडियावर प्रचंड चर्चा रंगवली आहे. (Ramayana Movie)
रणबीर कपूरसाठी (Ranbir Kapoor) ही भूमिका त्याच्या करिअरमधील एक मोठा टर्निंग पॉइंट मानली जात आहे. यापूर्वी त्याने एनिमल (Animal) सारख्या चित्रपटात एक आक्रमक, ग्रे शेड्स असलेला आणि भावनिकदृष्ट्या गुंतागुंतीचा व्यक्तिरेखा साकारली होती, ज्याने प्रेक्षकांना थक्क केले होते. त्या भूमिकेत त्याचा रफ, अनपेक्षित आणि कधीकधी हिंसक स्वभाव दिसला होता. मात्र आता तो थेट भगवान रामासारखी शांत, संयमी, आदर्श आणि मूल्यप्रधान व्यक्तिरेखा साकारताना दिसणार आहे. हा बदल केवळ लूकमध्ये नाही, तर संपूर्ण व्यक्तिमत्त्वात आहे आणि हाच कॉन्ट्रास्ट प्रेक्षकांसाठी सर्वात मोठा आकर्षण ठरत आहे.
या चित्रपटाची निर्मितीही तितकीच भव्य आहे. प्राइम फोकस स्टुडिओजच्या बॅनरखाली तयार होणाऱ्या या सिनेमासाठी आंतरराष्ट्रीय दर्जाचे VFX वापरले जात आहेत. ऑस्कर विजेत्या DNEG स्टुडिओसह ‘मॉन्स्टर माइंड क्रिएशन्स’च्या सहकार्यामुळे दृश्यांची भव्यता प्रेक्षकांना एक वेगळाच अनुभव देणार आहे. २ एप्रिल २०२६ रोजी ‘राम’च्या व्यक्तिरेखेची अधिकृत झलक सादर करण्यात आली, ज्यामुळे चाहत्यांची उत्सुकता आणखी वाढली आहे. या भूमिकेबद्दल बोलताना रणबीर कपूरने सांगितले की, तो केवळ अभिनय करत नाही, तर रामाच्या व्यक्तिमत्त्वातील साधेपणा, संयम आणि शुद्धता समजून घेण्याचा प्रयत्न करत आहे. त्याच्या मते, ही भूमिका त्याला एक वेगळा दृष्टिकोन आणि नम्रता शिकवणारी ठरली आहे. चित्रपटाची स्टारकास्टही तितकीच दमदार आहे. सीतेच्या भूमिकेत साई पल्लवी, लक्ष्मणाच्या भूमिकेत रवी दुबे आणि हनुमानाच्या भूमिकेत सनी देओल दिसणार आहेत. याशिवाय संगीतासाठी हॉलिवूडचे दिग्गज हंस झिमर आणि भारताचे प्रसिद्ध संगीतकार ए.आर. रहमान यांची जोडी लाभली आहे, ज्यामुळे चित्रपटाचा संगीतपटही जागतिक दर्जाचा असणार आहे. (Ramayana Movie)
=============================
=============================
‘रामायण: भाग १’ हा चित्रपट दिवाळी २०२६ मध्ये प्रदर्शित होणार असून, त्याचा दुसरा भाग दिवाळी २०२७ मध्ये प्रेक्षकांच्या भेटीला येणार आहे. हजारो वर्षांची ही पौराणिक कथा आता नव्या स्वरूपात, नव्या तंत्रज्ञानासह आणि नव्या पिढीसाठी सादर होत आहे. रणबीर कपूरचा ‘राम’ अवतार आणि त्याचा आधीच्या भूमिकांपासूनचा हा मोठा बदल प्रेक्षकांसाठी एक खास अनुभव ठरणार आहे.
