बॉलिवूडमधील सदाबहार आणि ग्लॅमरस अभिनेत्री माधुरी दीक्षित (Madhuri Dixit) पुन्हा एकदा चर्चेत आली आहे, पण यावेळी कारण आहे तिचा नवा बिझनेस मूव्ह. अभिनय आणि नृत्याने प्रेक्षकांची मनं जिंकणाऱ्या माधुरीने आता मुंबईत व्यावसायिक गुंतवणुकीकडे पाऊल टाकल्याचं समोर आलं आहे. मिळालेल्या माहितीनुसार, माधुरी दीक्षितने मुंबईतील लोअर परेल परिसरात एक प्रीमियम ऑफिस स्पेस भाड्याने घेतली आहे. ही मालमत्ता ‘वन लोढा प्लेस’ या नामांकित प्रोजेक्टमध्ये असून, सुमारे ७३१ चौरस फूट क्षेत्रफळाची आहे. या व्यवहारामध्ये एक कार पार्किंगची सुविधा देखील समाविष्ट आहे. विशेष म्हणजे, या भाडेकरारासाठी तब्बल १७ लाख रुपयांची सिक्युरिटी डिपॉझिट देण्यात आली असून, स्टॅम्प ड्युटी आणि नोंदणी शुल्क मिळून जवळपास ७३ हजारांहून अधिक खर्च झाला आहे.(Actress Madhuri Dixit)
या कराराचा कालावधी ५ वर्षांचा (६० महिने) आहे. पहिल्या वर्षी सुमारे ४.२५ लाख रुपये मासिक भाड्याने सुरू होणारा हा करार, दरवर्षी ५ टक्क्यांनी वाढत जातो. त्यानुसार, पाचव्या वर्षी हे भाडे ५ लाखांहून अधिक पोहोचणार आहे. एकूण पाच वर्षांमध्ये या जागेसाठी सुमारे २.८१ कोटी रुपयांचे भाडे दिले जाणार असल्याची माहिती समोर आली आहे. हा व्यवहार २४ मार्च २०२६ रोजी अधिकृतपणे नोंदवण्यात आला.मुंबईतील लोअर परेल हा सध्या शहरातील सर्वात प्रीमियम बिझनेस हब म्हणून ओळखला जातो. मोठ्या कॉर्पोरेट ऑफिसेस, मीडिया कंपन्या आणि स्टार्टअप्सची गर्दी असलेल्या या भागात जागा घेणं म्हणजे केवळ गुंतवणूक नाही, तर एक स्टेटस सिम्बॉल मानलं जातं. अशा ठिकाणी माधुरी दीक्षित हिने ऑफिस स्पेस घेण्याचा निर्णय हा त्यांच्या पुढील व्यावसायिक योजनांचा संकेत मानला जात आहे. त्यामुळे त्या भविष्यात प्रॉडक्शन, डिजिटल कंटेंट किंवा इतर व्यावसायिक प्रोजेक्ट्समध्ये अधिक सक्रिय होणार का, याबाबतही चर्चांना उधाण आलं आहे.
माधुरी दीक्षित ही केवळ एक अभिनेत्री नाही, तर भारतीय मनोरंजनविश्वातील एक आयकॉन आहे. ८०-९० च्या दशकात ‘तेजाब’, ‘दिल’, ‘बेटा’, ‘हम आपके हैं कौन…!’ आणि ‘दिल तो पागल है’ यांसारख्या सुपरहिट चित्रपटांनी तिने बॉक्स ऑफिस गाजवलं. ‘धक-धक गर्ल’ ही ओळख मिळाल्यानंतर तिची लोकप्रियता आणखी वाढली. तिच्या अभिनयातली सहजता आणि नृत्यातील अचूकता यामुळे ती आजही प्रेक्षकांची आवडती राहिली आहे. विशेष म्हणजे, काळानुसार स्वतःला बदलत ठेवण्याची तिची कला तिला आजही ट्रेंडमध्ये ठेवते. चित्रपटांबरोबरच तिने टेलिव्हिजन, रिअॅलिटी शो आणि डिजिटल प्लॅटफॉर्मवरही यशस्वी उपस्थिती दर्शवली आहे. ‘मजा मा’ आणि ‘द फेम गेम’ सारख्या प्रोजेक्ट्समधून तिने नव्या पिढीशीही कनेक्शन टिकवून ठेवलं आहे.(Actress Madhuri Dixit)
=============================
=============================
एकंदरीत, माधुरी दीक्षितचा हा नवा व्यावसायिक निर्णय तिच्या करिअरमधील आणखी एक स्मार्ट स्टेप मानला जात आहे. अभिनयाच्या पलीकडे जाऊन गुंतवणुकीच्या क्षेत्रातही ती सक्रिय होत असल्याचं स्पष्ट होतंय. त्यामुळे आगामी काळात ती आणखी कोणते नवे निर्णय घेते, याकडे चाहत्यांचं लक्ष लागून राहिलं आहे.
