Zee Marathi वरील अत्यंत लोकप्रिय ठरलेल्या ‘चला हवा येऊ द्या’ (Chala Hava Yeu Dya) या कार्यक्रमाच्या नव्या पर्वाची सुरुवात 26 जुलै 2025 रोजी झाली. मात्र, या पर्वात काही जुनी आणि प्रेक्षकांच्या मनात घर करून बसलेली चेहरे नसल्यामुळे चाहत्यांना सुरुवातीला मोठी निराशा झाली. डॉ. निलेश साबळे (Dr.Nilesh Sable), भाऊ कदम (Bhau Kadam)आणि सागर कारंडे (Sagar Karande)हे कलाकार या पर्वात नसल्याने सोशल मीडियावर अनेकांनी हळहळ व्यक्त केली.(Bhau Kadam and Nilesh Sable Together)
नव्या पर्वात मात्र श्रेया बुगडे, भारत गणेशपुरे, कुशल बद्रिके, प्रियदर्शन जाधव आणि गौरव मोरे हे कलाकार प्रमुख भूमिकेत दिसत आहेत. तर कार्यक्रमाचं सूत्रसंचालन अभिनेता अभिजीत खांडकेकर करत आहे. नवीन टीमने प्रेक्षकांचं मनोरंजन सुरू ठेवलं असलं, तरी अनेकांना अजूनही ‘चला हवा येऊ द्या’च्या जुन्या टीमची आठवण येत होती. अशातच झी मराठीने अलीकडेच आपल्या सोशल मीडिया प्लॅटफॉर्मवर एक नवा प्रोमो शेअर केला आणि त्यामुळे प्रेक्षकांमध्ये उत्सुकता शिगेला पोहोचली. या प्रोमोत दोन व्यक्ती पाठमोऱ्या उभ्या असल्याचं दिसत आहे.आणि प्रोमोमधील कॅप्शनने मात्र सर्वांचं लक्ष वेधून घेतलं. कॅप्शनमध्ये म्हटलं आहे,“बाकीच्यांचं कमबॅक 2026 मध्ये होणार असेल, तर आपलं कमबॅक 2025 मध्येच!” ‘उगाच’ नाही… बघाच! लवकरच…
हा प्रोमो पाहताच अनेक चाहत्यांनी अंदाज बांधायला सुरुवात केली की, हे पाठमोरे दिसणारे कलाकार म्हणजे भाऊ कदम आणि डॉ. निलेश साबळेच असावेत. कमेंट सेक्शनमध्ये चाहत्यांचा उत्साह स्पष्टपणे दिसून आला. काहींनी तर थेट त्यांच्या पुनरागमनाची खात्री असल्यासारख्या प्रतिक्रिया दिल्या. मात्र, हे दोघे कलाकार पुन्हा ‘चला हवा येऊ द्या’ मध्ये दिसणार की नाही, याबाबत अद्याप स्पष्टता नाही. कारण प्रोमोमधील ‘उगाच’ या शब्दावर आणि #Ugach या हॅशटॅगवरून वेगळाच अंदाज लावला जात आहे. झी मराठीवर सध्या चर्चेत असलेल्या ‘उगाच अवॉर्ड्स’ या नव्या संकल्पनेशी हा प्रोमो संबंधित असण्याची शक्यता व्यक्त केली जात आहे.(Bhau Kadam and Nilesh Sable Together)
=============================
हे देखील वाचा: Lakshmichya Pavlani मालिकेचा प्रवास संपला; Isha Keskar च्या जाण्याचा TRP ला फटका!
=============================
‘उगाच अवॉर्ड्स’मध्ये झी मराठीवरील विविध मालिकांमधील कलाकारांना भन्नाट आणि हटके पुरस्कारांसाठी नामांकन देण्यात येत आहे. ‘सर्वोत्कृष्ट भपाव अवॉर्ड’, ‘सर्वोत्कृष्ट नट्टापट्टा अवॉर्ड’, ‘सर्वोत्कृष्ट झोलर अवॉर्ड’ अशा मजेशीर श्रेणींमुळे हा पुरस्कार सोहळा चर्चेत आहे. वर्षाअखेरीस होणाऱ्या या विशेष कार्यक्रमातूनच भाऊ कदम आणि डॉ. निलेश साबळे यांचं झी मराठीवर पुनरागमन होऊ शकतं, असा अंदाज लावला जात आहे. आता हे पुनरागमन नेमकं कुठल्या मंचावर होणार, याची उत्सुकता प्रेक्षकांना लागून राहिली आहे. चाहत्यांना मात्र एकच अपेक्षा आहे की भाऊ आणि निलेश पुन्हा एकदा छोट्या पडद्यावर धमाल करताना पाहायला मिळावेत.
