मराठी रंगभूमीवर दर्जेदार नाट्यकृती सादर करण्याची परंपरा जपणारी ‘दि गोवा हिंदु असोसिएशन’ पुन्हा एकदा नाट्यप्रेमींसाठी नवे पर्व घेऊन येत आहे. काही काळाच्या विश्रांतीनंतर ही प्रतिष्ठित संस्था नव्या जोमाने रंगभूमीवर सक्रिय होत असून, त्यांच्या आगामी नाटकाचे नाव आहे ‘सुभेदार गेस्ट हाऊस’ (Subhedar Guest House). दि गोवा हिंदु असोसिएशन आणि सुकल्प चित्र यांच्या संयुक्त प्रयत्नांतून साकारलेले हे नाटक येत्या २५ डिसेंबरपासून रसिक प्रेक्षकांच्या भेटीला येणार आहे. या नाटकाची निर्मिती दि गोवा हिंदु असोसिएशन, कल्पक सदानंद जोशी आणि अमरजा गोडबोले यांनी केली आहे.(Subhedar Guest House Play)
या नाटकाचा पहिला प्रयोग पुण्यात २५ डिसेंबर रोजी यशवंतराव चव्हाण नाट्यगृह, कोथरूड येथे होणार असून, त्यानंतर मुंबईतील पहिला प्रयोग २६ डिसेंबर रोजी शिवाजी मंदिर येथे सादर केला जाणार आहे. ‘सुभेदार गेस्ट हाऊस’ या नाटकाची कथा शिरीष देखणे यांनी लिहिली असून, दिग्दर्शनाची जबाबदारी ज्येष्ठ दिग्दर्शक विजय केंकरे (Vijay Kenkare) यांनी सांभाळली आहे. अभिनयाच्या आघाडीवर सौरभ गोखले, शंतनू मोघे, आनंद म्हसकर, मृण्मयी गोंधळेकर, विनिता दाते, सना कुलकर्णी, रोहित देशमुख आणि आनंद पाटील यांसारखे कसदार कलाकार या नाटकात झळकणार आहेत.
नाटकाची तांत्रिक बाजूही तितकीच भक्कम आहे. नेपथ्याची रचना प्रदीप मुळ्ये यांनी केली असून, संगीत अजित परब यांचे आहे. गीतलेखन वैभव जोशी यांचे असून, प्रकाशयोजना शीतल तळपदे, रंगभूषा शरद विचारे आणि वेशभूषा मंगल केंकरे यांनी साकारली आहे. सूत्रधार म्हणून श्रीकांत तटकरे आणि राजेंद्र पै यांची भूमिका महत्त्वाची आहे. (Subhedar Guest House Play)
================================
================================
दि गोवा हिंदु असोसिएशन पुन्हा रंगभूमीवर कार्यरत होत असल्याची बातमी समजताच नाट्यरसिकांमध्ये उत्सुकतेचे वातावरण निर्माण झाले आहे. दमदार कथा, अनुभवी दिग्दर्शन आणि मजबूत तांत्रिक टीम यांच्या जोरावर ‘सुभेदार गेस्ट हाऊस’ हे नाटक मराठी रंगभूमीवर आपली खास छाप पाडेल, अशी अपेक्षा व्यक्त केली जात आहे.
